ZIRKULU POLARRAREN KOADRATURA

Matematikan, zientzietan eta hizkuntzan, gure ikasleek PISA froga egiten dute hiru urtez behin. Finlandiarrak goreneko postuetan egon ohi dira kanpo froga horietan, eta gurean, batek baino gehiagok galdetzen du zer egin ote dezakegun, gure ikasleek ere kalifikazio goren horiek lor ditzaten ebaluazio diagnostiko horretan: konparatu egin nahi dituzte Euskal Herria eta Finlandia, baina ez dakite nola, ezinezko problema bat dirudi.

Matematiketan, problema klasiko bat da zirkuluaren koadratura. Greziarrak ohartu ziren, lehenengoz, ezinezkoa dela zirkulu baten azalera bera izango duen karratu bat lortzea, erregela eta konpasa soilik erabiliz. Finlandia Baltikotik Zirkulu Polarrera hedatzen den lurraldea da, eta, akaso, ez du ikusteko handirik izango hegoaldeko latitudeetan eta Atlantikoaren itsasertzean dagoen Euskal Herri karratuarekin.

Finlandiar hezkuntzaren errealitatea eta historia Euskal Herrikoarekin alderatuz, irakurleak zenbait gako eta adibide aurkituko ditu liburu honetan, prentsan hezkuntzari buruz agertzen diren titular sentsazionalisten atzean ezkutatzen den egia argitzeko. Zirkulu polarra koadratzeko saiakera bat duzu hau, finean.

Reseña del Editor